ڈپٹی کمشنر سوات سلیم جان مروت کی سربراہی میں آن لائن کھلی کچہری کا انعقاد

ڈپٹی کمشنر سوات سلیم جان مروت کی سربراہی میں آن لائن کھلی کچہری کا انعقاد — عوامی مسائل کے فوری حل کی جانب ایک مؤثر قدم

سوات، 22 اکتوبر 2025ء

وزیر اعلیٰ خیبر پختونخوا اور چیف سیکرٹری خیبر پختونخوا کی ہدایات کی روشنی میں ضلعی انتظامیہ سوات کی جانب سے شہریوں کے مسائل اُن کی دہلیز پر حل کرنے کے لیے ایک آن لائن کھلی کچہری کا انعقاد کیا گیا۔

یہ آن لائن کھلی کچہری ڈپٹی کمشنر سوات سلیم جان مروت کی زیر صدارت منعقد ہوئی، جسے ڈپٹی کمشنر سوات کے آفیشل فیس بُک پیج پر براہِ راست نشر کیا گیا۔ ضلع بھر کے شہریوں نے بھرپور شرکت کرتے ہوئے اپنے انفرادی و اجتماعی مسائل، مشکلات اور تجاویز کمنٹس کے ذریعے براہِ راست ڈپٹی کمشنر سے شیئر کیں۔

آن لائن سیشن میں ضلع سوات کے تمام اسسٹنٹ کمشنرز ویڈیو لنک کے ذریعے موجود تھے، جنہوں نے متعلقہ شکایات کے فوری جوابات دیے اور ان کے حل کے لیے عملی اقدامات کی یقین دہانی کرائی۔

ڈپٹی کمشنر سوات نے موصولہ شکایات کا ایک ایک کر کے جائزہ لیا اور متعدد مسائل کا موقع پر ہی ازالہ کیا۔ باقی معاملات کے حل کے لیے متعلقہ محکموں کو فوری اقدامات کی ہدایت جاری کرتے ہوئے جلد از جلد رپورٹ پیش کرنے کا حکم دیا۔

آن لائن کچہری کے دوران شہریوں نے صحت و صفائی، نکاسی آب، آرمز لائسنس کے اپروول، ڈرائیونگ لائسن کی پرنٹنگ، کالام روڈ کی بحالی، اشیائے خوردونوش کی قیمتوں میں اضافہ، اشاڑے مٹہ کے عوام کو ٹیوب ویل کنکشن کی فراہمی، منگورہ سبزی منڈی کو اُوڈیگرام منتقل کرنے کا مسئلہ، تعلیم، صحت کی سہولیات، سڑکوں کی تعمیر و مرمت، ٹریفک مینجمنٹ، غیر قانونی آڈوں کے خلاف کارروائی، تجاوزات کے خاتمے، منشیات کے تدارک اور دیگر عوامی فلاحی امور سے متعلق شکایات اور تجاویز پیش کیں۔

ڈپٹی کمشنر سوات نے یقین دہانی کرائی کہ صوبائی حکومت خیبر پختونخوا کے گڈ گورننس روص میپ کے تحت عوامی مسائل کے حل کو ضلعی انتظامیہ کی اولین ترجیح قرار دیا گیا ہے اور اس سلسلے میں تمام دستیاب وسائل بروئے کار لائے جائیں گے تاکہ عوام کو بہتر اور مؤثر سہولیات فراہم کی جا سکیں

Share On: